無綫48年嚟首次停辦香港小姐競選　去年三甲或冧莊做多屆

新冠肺炎全球肆虐，唔少大型活動都因此而宣怖取消。

而往年差唔多依個時間開始報名嘅《香港小姐競選》今年亦決定取消。

自1973年開始，港姐已舉辦咗47屆，踏入今年第48屆，每年嚟自世界各地嘅參賽者爭妍鬥麗，競選前後都必定會掀起唔少話題。

Photo from TVB

因應疫情關係，無綫繼早前宣佈延期嘅《2020國際中華小姐競選》將會暫停之後，依日再決定停辦港姐競選。

報導中，無綫高層余詠珊直認此事因疫情影響好多問題未能夠解決，並指唔希望有內地同海外人士冒險赴港參選。

Photo from carmaneysantiago/IG

此外，佢又指出賽前嘅宣傳工作及競選過程亦是係難題之一：「港姐競選期間會有好多宣傳活動、大型記者會，咁一班佳麗究竟戴唔戴口罩好呢？如果疫情愈嚟愈嚴重，政府再收緊政策，更加唔知點做。宣傳之外，仲有節目嘅製作，除咗十幾個佳麗外，我哋仲有好多工作人員喺現場。考慮到咁多問題都冇解決方法，我哋只好暫停一年，再加上疫情陰霾之下，製作載歌載舞嘅節目，亦唔係咁合適。」

不過是否由去年三甲黃嘉雯、王菲及古佩玲冧莊做多屆，余詠珊就冇明言。

Photo from carmaneysantiago/IG

而一班應屆港姐冠軍黃嘉雯、亞軍王菲就指暫未收到停辦港姐，冧莊做足兩年嘅消息，不過佢哋都紛紛表示對於取消華姐及港姐感到可惜及無奈，在疫情下健康先係最重要，期望大家能同心協力共度難關，並鼓勵有意參選嘅女仔唔使灰心，明年仲有機會可以再報名。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）